संत भानुदास

संत भानुदास अभंग काला

संत भानुदास अभंग काला गाथा – एकूण ७ अभंग

८६

अवघ्या सोडियेल्या मोटा ।
आजीचा दहिंकाला गोमट ॥१॥
घ्या रे घ्या रे दहींभात ।
आम्हां देतो पंढरीनाथ ॥२॥
मुदा घेऊनियां करीं ।
पेंद्या वांटितो शिदोरी ॥३॥
भानुदास गीतीं गात ।
प्रसाद देतो पंढरीनाथ ॥४॥


८७

गूढीयेसी सांगु आलें ।
कंस चाणूर मर्दिले ॥१॥
हर्ष नाचताती भोजें ।
जिंकियेले यादवराजें ॥२॥
गुढी आली वृंदावना ।
मथुरा दिली उग्रसेना ॥३॥
जाला त्रिभुवनीं उल्हास ।
लळीत गाये भानुदास ॥४॥


८८

गाई गोप विप्राचार संध्यावंदन ।
अपूज्य लिंगा पूजन साधू दरुशन ॥१॥
जयजय सुशब्द बोलती जन ।
कोटि युगें राज्य करीं रघुनंदन ॥२॥
भरत शत्रुघ्र जवळी लक्ष्मण ।
शौर्य विद्या साजे रघुनंदन ॥३॥
कौसल्या सुमित्रा वोवाळिती रामातें ।
देवा भानुदास गुण गातसे तेथें ॥४॥


८९

आशीर्वाद देती भार्गव तो राम ।
विजय मेघःश्याम होई सुखें ॥१॥
राज्य करीं बळें सर्वत्रीं आनंद ।
नाहीं दुजा शब्द रामा तुशीं ॥२॥
भानुदास म्हणे आनंदे श्रीराम ।
सुखरुप आत्माराम अयोध्याधीश ॥३॥


९०

रायें कंठमाळ देवासी घातली ।
देवं त्या दिधली भानुदासा ॥१॥
कोणी नेली माळ करती त्याचा शोध ।
देखिली प्रसिद्ध याचे गळां ॥२॥
राजदुतीं नेला म्हणती गे हे चोर ।
रायानें विचार नाहीं केला ॥३॥
सुळीं द्यावया भानुदास नेला ।
तेणें आठविला पांडुरंग ॥४॥


९१

कोरडिया काष्ठीं अंकूर फुटले ।
येणें येथें जालें विठोबाचे ॥१॥
समर्थाचा आम्हीं धरिला आधार ।
जाणोंनी सत्वर आला येथें ॥२॥
माझिये संकटीं आलासी धांऊनी ।
भानुदास चरणीं लागतसे ॥३॥


९२

सांडोनि तितुकें यथाबीज केलें ।
कैंसे चाळविलें कानडीयाने ॥१॥
रखुमाई आई ती जालीसे उदास ।
पुंडलिका कैसें पडिलें मौन ॥२॥
कनकाचें ताटीं रत्‍नाचे दीपक ।
सुंदर श्रीमुख वोवाळती ॥३॥
भानुदास म्हणे चला मजसवें ।
वाचा ऋणदेवें सांभाळावें ॥४॥

संत भानुदास अभंग काला समाप्त


हे पण वाचा: संत भानुदास यांची संपूर्ण माहिती 


शेतमालाची मोफत जाहिरात करण्यासाठी कृषी क्रांती ला अवश्य भेट द्या

ref: transliteral

संत भानुदास अभंग काला समाप्त संत भानुदास अभंग काला समाप्त

Leave a Comment

Your email address will not be published. Required fields are marked *