उभारिला ध्वज तिहीं – संत निळोबाराय अभंग – ४७२
उभारिला ध्वज तिहीं लोकांवरी ।
ऐशी चराचरी कीर्ति ज्याची ॥१॥
ते हे निवृत्तिनाथ ज्ञानेश्वर सोपान ।
मुक्ताबाई ज्ञान दीप्ती कळा ॥२॥
धरुनि सगुण रुपें केली क्रीडा ।
बोलविला रेडा निगम वावे ॥३॥
बैसूनियां वरी चालविली भिंती ।
चांगदेवा प्रती दिली भेटी ॥४॥
मग वास केला अळंकापुरासी ।
पिंपळ व्दारासी कनकाचा ॥५॥
निळा म्हणे ज्याच्या नामें करितां घोष ।
नातळती दोष कळिकाळाचे ॥६॥