संत निळोबाराय (संतांपाशीं करुणा भाकणें)
१४४२
तुमच्या पायीं ठेविलें मन । एवढेंचि धन मजपाशीं ॥१॥
जरी हा देव दाखवाल । अभय दयाल वचनाचें ॥२॥
तरी हा प्राण ओंवाळीन । जीवें चरण न सोडीं ॥३॥
निळा म्हणे कृपा करा । यावरी धरा मजहातीं ॥४॥
१४४३
तुम्ही संत दयाघन । आम्हां म्हणऊन विनवितों ॥१॥
सलगी केंली पायांपाशीं । करा अपराधासी क्षमा त्या ॥२॥
मी तों नेणतेंचि अपत्य । तुम्ही संत मायबाप ॥३॥
निळा म्हणे बोबडे बोल । बोलेन शिकवाल तुम्ही ते ॥४॥
१४४४
मज तों माझें न कळोचि हित । पतिता पतित आगळा ॥१॥
परी तुम्हीं लाविले कांसे । उतरा जैसें उतराल ॥२॥
कर्महीन मतिहीन । न कळेचि ज्ञान विहिताचें ॥३॥
निळा म्हणे धरिलें हातीं । हेचि निश्चिती मानियेली ॥४॥
१४४५
विनंती माझी एकीं ऐका । अहो पुंडलिका महामुनी ॥१॥
ठाव दयावा चरणांपाशीं । मज विठोबासी विनवुनी ॥२॥
अंगिकारा रंका दीना । विज्ञापना हे माझी ॥३॥
निळा म्हणे सांभाळावें । मज हें दयावें वरदान ॥४॥
१४४६
सर्वकाळ खंती वाटे । कैं तो भेटे मज आतां ॥१॥
न लोटे पळ युगा ऐसें । रात्री दिवसें सम झालीं ॥२॥
करुणामुखें भाकी कींव । ये वो ये वो म्हणउनी ॥३॥
निळा म्हणे जाणवा मात । तुम्ही संत एकांती ॥४॥
१४४७
निरवूनियां विठ्ठल देवा । हातीं धरावा मज आतां ॥१॥
तुमचिया भिडा अंगिकार । करील साचार तत्क्ष्णी ॥२॥
जरी मी अन्यायी अपराधी । तरी कृपानिधी तुम्ही संत ॥३॥
निळा म्हणे विनऊं काय । तुम्ही मायबाप अपत्य मी ॥४॥
१४४८
अंतरींचे मनोगत । तुम्ही तों सतत जाणतसां ॥१॥
तरी वियोग नका आतां । तुमच्या भजना भजनासी ॥२॥
आठव करितां दिवसरात्री । उल्हास चित्तीं मना दयावा ॥३॥
निळा म्हणे कृपाघना । विज्ञापना हे माझी ॥४॥
१४४९
एवढा मनींचा पुरवा हेत । पंढरीनाळा भेटवा ॥१॥
मग मी तुमच्या न सोडीं पायां । करीन काया कुरवंडी ॥२॥
कृपासिंधु तुम्ही संत । पुरवा आर्त हें माझें ॥३॥
निळा म्हणे झालों दास । नका उदास धरुं आतां ॥४॥
१४५०
भेटवाल पंढरीनाथ । तुम्हीचि संत कृपाळु ॥१॥
म्हणोनि येतों काकुळती । पुढतोंपुढती कींव भाकीं ॥२॥
इतरांची मी न करीं आस । झालों दास तुमचाची ॥३॥
निळा म्हणे ठेवा पायीं । यावरी कायी विनवूं मी ॥४॥
संत निळोबाराय गाथा । संत निळोबाराय अभंग । निळोबा अभंग । निळोबा गाथा । सर्व गाथा । निळोबाराय माहिती । पिंपळगाव मंदिर निळोबाराय । sant nilobaray gatha | sant nilobaray abhang | niloba abhang | niloba gatha | sarv gatha | nilobaray mahiti | nilobaray mandir pimpalgav |देवभक्त यांची एकरुपता संत निळोबाराय (संतांपाशीं करुणा भाकणें)
तुमच्या शेतमालाची जाहिरात करण्यासाठी कृषी क्रांतीला भेट द्या .